काठमाडौं । कतार विश्वकपमा वर्तमान समयका दुई महान फुटबलर मैदानमा उत्रदैँछन् । ती हुन् लियोनल मेसी र क्रिस्टियानो रोनाल्डो ।

संयोग, दुवै खेलाडीले आफ्नो देशका लागि विश्वकपको उपाधि उचाल्न सकेका छैनन् ।  सन्न्यासपछि पनि मेसी वा रोनाल्डोमध्ये को उत्कृष्ट भन्ने बहस जारी नै रहनेछ । 

कतार विश्वकप ३५ वर्षे मेसी तथा ३७ वर्षे रोनाल्डोका लागि अन्तर्राष्ट्रिय फुटबलको सबैभन्दा ठूलो अन्तिम मौका हुनसक्छ । 

यसपटक अर्जेन्टिना विश्वकप जित्ने एक बलियो टोली भएको धेरै फुटबल विज्ञहरुको विश्लेषण छ ।  जसले मेसीको करियरमा कमी रहेको विश्वकपको उपाधि दिलाउन सक्छ । 

सन् २०१४ को विश्वकपमा अर्जेन्टिना फाइनलमा जर्मनीसँग पराजित हुँदा पनि अर्जेन्टिनाको खेल मेसीको वरपर घुमेको थियो । तर अहिले उत्कृष्ट रक्षापंक्ति र मिडफिल्ड भएका कारण अर्जेन्टिनाले विश्वकप जित्ने सम्भावना बलियो रहेको मानिएको छ । 

तथापी अर्जेन्टिनालाई समूह चरणपछिको यात्रा सहज भने हुनेछैन ।  रोनाल्डोका लागि अवस्था भने फरक छ । पोर्चुगललाई अर्जेन्टिनाजत्तिको बलियो मानिएको छैन । 

टिममा राम्रा खेलाडी भए पनि पोर्चुगलले छनोट प्रतियोगितामा प्ले–अफ खेलेर विश्वकपमा स्थान बनाएको थियो । 

कतारमा रोनाल्डो र मेसीको टिमले जस्तो नतिजा निकाले पनि उनीहरूको चर्चा भने चलिरहने छ ।  तथापी दुबैका लागि विश्व फुटबलको सबैभन्दा ठूलो मञ्चमा चम्कने अन्तिम मौका हुन सक्छ  । 

यसपटक बालोन डी‘अर अवार्ड जित्न सफल फ्रान्सका करिम बेन्जेमाका लागि पनि यो विश्वकप अन्तिम थियो ।
तर, उनले चोटका कारण विश्वकप गुमाउने भएका छन् । फ्रान्सले २०१८ को विश्वकप जिते पनि बेन्जेमा त्यो टिममा थिएनन् । यसकारण, उनको राष्ट्रले विश्वकपको उपाधि चुमे पनि खेलाडीका रुपमा उनले मैदानमा त्यसलाई अनुभव गर्न पाएनन् । 

उनीहरू जस्तै अन्य चर्चित खेलाडीहरूका लागि पनि कतार विश्वकप अन्तिम हुनेछ । 

नेइमार :

३० वर्षीय ब्राजिलियन स्ट्राइकर नेयमारका लागि यो तेस्रो विश्वकप हुनेछ । उनले हालसम्म विश्वकपमा १० खेल खेल्दै ६ गोल गरिसकेका छन् । 

नेयमार ब्राजिलका मुख्य खेलाडी मानिन्छन् र उनले अझै पनि सन् २०१४ को पीडा भुल्न सकेका छैनन् होला किनभने क्वार्टरफाइनलमा घाइते भएपछि उनको विश्वकपको यात्रा टुंगिएको थियो । 

नेइमार आफैले पनि कतार आफ्नो अन्तिम विश्वकप हुने बताएका छन् । 

नेयमारलाई थाहा छ यसपटक यदि उनले राम्रो प्रदर्शन गर्न सकेनन् भने भिनिसियस जुनियर, राफिन्हा, एन्टोनियो अथवा रिचार्लिसनले उनलाई विस्थापित गर्नेछन् ।

त्यसैले यस वर्षको विश्वकप कतिपय खेलाडीका लागि इतिहासमा नाम लेखाउने तथा कतिपयका लागि यसअघिका विश्वकपमा भोगेको निराशालाई मेटाउन कतार उत्कृष्ट स्थल हुन सक्छ ।

रोवर्ट लेवानडोवस्की :

पोल्यान्डका स्ट्राइकर रोबर्ट लेवान्डोवस्कीको यो दोस्रो विश्वकप हो ।  ३४ वर्ष वर्षीय लेवान्डोवस्कीको सम्भवतः यो अन्तिम विश्वकप हो । 

२०१८ को विश्वकप खेले पनि लेवान्डोवस्कीले विश्वकपमा हालसम्म गोल भने गर्न सकेका छैन ।  यसैकारण यो वर्ष विश्वकपमा उत्कृष्ट गर्नु उनको लक्ष्य बनेको छ । 

जर्मन क्लब बायर्न म्युनिखबाट विश्व फुटबलमा उत्कृष्ट स्ट्राइकरको पहिचान बनाएका लेवान्डोवस्की हाल स्पेनिस क्लब बार्सिलोनाबाट व्यवसायिक फुटबल खेल्छन् । 

राष्ट्रिय टिमबाट अन्तर्राष्ट्रिय प्रतियोगितामा खास चर्चा कमाउन नसकेपनि उनको व्यवसायिक करियरले भने ठूलो सफलता चुमिसकेको छ । 

उनले सन् २०२० मा फिफा र युइएफएको वर्ष खेलाडी चुनिएका थिए ।  यसबाहेक उनले थुप्रै व्यक्तिगत उपलब्धिका अवार्ड जितेका छन् । 

लुका मोड्रिच :

सन् २००६, २०१४ र २०१८ को विश्वकप खेलेका ३७ वर्षीय क्रोयसियन मिडफिल्डर मोड्रिचले विश्वकपमा १२ खेल खेल्दै २ गोल समेत गरेका छन् । 

रोमियोका अनुसार मोड्रिच क्रोयसियाले पाएको सबैभन्दा उत्कृष्ट खेलाडी पाएको हो । 

रोमियोको विश्वास के छ भने मोड्रिचको उमेर बढी भएपनि उनी शारीरिक रुपमा सन् २०१८ झै बलिया तथा लामो समय मैदानमा टिक्न सक्ने खेलाडी हुन् ।

लुइज सुआरेज :

लगातार तीनवटा विश्वकप खेलिसकेका ३५ वर्षीय उरुग्वेका स्ट्राइकर सुआरेजले १२ खेलमा ७ गोल गरिसकेका छन् । 
तर उनी विवाद र चर्चामा आइरहने खेलाडीको रुपमा बढी चिनिन्छन् । 

रोमियोका अनुसार सुआरेजले भने अर्जेन्टिनाका लागि खेल्दा खराब पाटोलाई छाँयामा पारेका छन् । 

विश्वकप छनोट अन्तर्गत उनी सर्वाधिक गोलकर्ता खेलाडीहरुमध्ये एक थिए । उनी अझै पनि विश्वकै एक उत्कृष्ट स्ट्राइकर हुन् ।

म्यानुयल नुयर :

२०१४ को विश्वकप फाइनलमा अर्जेन्टिनालाई १–० हराउँदै समग्रमा चौथो पटक विश्वकपको उपाधि जित्दा म्यानुयल नुयरले नै जर्मनीको कप्तानी सम्हालेका थिए । 

सन् २०१० देखि विश्वकप खेल्दै आएका नुयरको यो चौथो विश्वकप हो । 

३६ वर्षीय नुयरलाई अझै पनि युरोपको उत्कृष्ट गोलकिपरमध्येमा गनिन्छन् । २०१४ को विश्वकपका नुयरले ‘गोल्डेन ग्लभ्स’ जितेका थिए । यसपटक पनि जर्मनी नुयरकै नेतृत्वमा विश्वकप खेल्दैछ । र यो नै उनको अन्तिम विश्वकप बन्न सक्छ ।

थोमस मुलर :

राष्ट्रिय टिमबाट ११८ खेल खेल्दा ४४ गोल गरेका थोमस मुलरलाई विश्व फुटबलका चतुर मिडफिल्डर मानिन्छ । 

बलमा नियन्त्रणसँगै गोल गर्न पनि माहिर मुलर ३३ वर्ष भइसकेका छन् । 

र, कतार विश्वकप नै उनको अन्तिम विश्वकप बन्न सक्छ । राष्ट्रिय टिमबाट विश्वकपको उपाधि जितिसकेका उनले बायर्न म्युनिखबाट आफ्नो व्यवसायिक करियरलाई उत्कृष्ट बनाइसकेका छन् । उनी यो विश्वकपमा पनि जर्मनीका महत्वपूर्ण खेलाडी हुन् ।

गारेथ बेल : 

सन् १९५८ पछि पहिलो पटक विश्वकप खेलिरहेको वेल्सका लागि फरवार्ड गारेथ बेल महत्वपूर्ण खेलाडी हुन् । 
र ३३ वर्षीय बेलको यो नै पहिलो र अन्तिम विश्वकप बन्न सक्छ । 

व्यावसायिक करियरमा यिाल मड्रिडबाट सबैखाले उपाधि जितेका बेल २०२६ को विश्वकपसम्म ३७ वर्ष पुग्नेछन् । यस्तोमा वेल्सले लगातार दोस्रो पटक विश्वकप खेल्ने सम्भावना बारेपनि अर्को प्रश्न पनि छ । 

ड्यानियल आल्भेस :

सन् २०१९ को कोपा अमेरिका र २०२० को समर ओलम्पिकमा ब्राजिलले स्वर्ण पदक जित्दा आल्भेस टिमका महत्वपूर्ण सदस्य थिए । 

तीन वर्षअघि ब्राजिलले कोपा अमेरिकाको उपाधि जित्दा आल्भेस प्रतियोगिताको सर्वोत्कृष्ट खेलाडी चुनिएका थिए । 

३९ वर्षीय आल्भेस कतार विश्वकपमा पनि ब्राजिलको टिममा छन् । 

२०१० र २०१४ को विश्वकप खेलेका आल्भेस चोटका कारण २०१८ को विश्वकपका लागि घोषित ब्राजिलको टिममा परेनन् । 

कतारमा तेस्रो पटक विश्वकप खेल्दै गर्दा आल्भेसको यो नै अन्तिम विश्वकप बन्ने पक्का छ ।