काठमाडौं । कतार विश्वकपको उद्घाटन समारोह समाप्त भएको छ । सेन्ट्रल दोहाबाट ३५ किलोमिटर उत्तरमा रहेको अल खोर सिटीस्थित अल बायत रंगशालामा भव्यताका साथ उद्घाटन समारोह समाप्त भएको हो । 

उद्घाटन समारोहमा कतारका घानियन अल मुफ्ताहलाई नायकका रुपमा प्रस्तुत गरिएको थियो । उनी ‘काडल रिग्रेसन सिन्ड्रोम’का साथ जन्मिएका थिए । जसले मेरुदण्डको तल्लो भागलाई असर गर्छ । अल मुफ्ताहलाई ‘मिराकल ब्वाई’ भनेर पनि चिनिन्छ । त्यस्तै, अमेरिकी कलाकार मोर्गान फ्रीम्यान, कतारकै गायक फहाद अल कुबैसी र दक्षिण कोरियाका गायक जुङ कुकले प्रस्तुति दिएका थिए । 

त्यस्तै पुरानो विश्वकपका मस्कटहरू पनि एकसाथ प्रस्तुत गरिएको थियो । कतारका संस्कृति झल्काउने प्रस्तुतिका साथै कतारी फुटबलको विकास क्रमलाई पनि प्रस्तुत गरिएको थियो । साथै आतिसबाजी पनि गरिएको थियो । 

उद्घाटन खेलमा आयोजक कतार र इक्वेडरले प्रतिस्पर्धा गर्दैछन् । कतारको यो पहिलो विश्वकप हो भने इक्वेडरले यसअघि तीनपटक खेलिसकेको छ ।