काठमाडौं । म्यानचेस्टर युनाइटेडका मिडफिल्डर क्रिस्टियन इरिक्सन कतारमा हुने फिफा विश्वकप २०२२ का लागि डेनमार्कको प्रारम्भिक टोलीमा परेका छन् ।

३० वर्षीय इरिक्सन गत वर्ष सम्पन्न युरो २०२० मा फिनल्यान्डविरुद्ध खेलका क्रममा मैदानमै ढलेका थिए । मैदानमा उनको जीवन बचाउन प्राथमिक उपचार गरिएको थियो । उनलाई लगत्तै अस्पताल भर्ना गरिएको थियो ।

गएको जनवरीमा सम्पन्न युरो २०२२ मा इरिक्सनको ‘कार्डियक एरेस्ट’ भएको हो । टोटनहमका पूर्वमिडफिल्डर इरिक्सनको मुटुमा ‘इम्प्लान्टेबल कार्डियोभर्टर डिफिब्रिलेटर (आईसीडी) उपकरण (एक प्रकारको पेसमेकर) जडान गरिएको छ ।

डेनमार्कले प्रारम्भिक रूपमा २१ सदस्यीय टिमको घोषणा गरेको छ । विश्वकपमा योपटक २६ सदस्यीय टिम हुनेछ । बाँकी पाँच खेलाडी युरोपियन क्लब फुटबलको अन्तिम चरणका खेलपछि घोषणा गर्ने डेनमार्कले जनाएको छ ।

डेनमार्कले नोभेम्बर २२ मा ट्युनिसियाविरुद्धको खेलबाट विश्वकपको सुरुआत गर्नेछ । प्रतियोगिता नोभेम्बर २० मा सुरु हुनेछ । सहभागी सबै टिमले १३ नोभेम्बरभित्र टिमको अन्तिम सूची फिफामा बुझाउनुपर्नेछ ।

इरिक्सनले पार्केन रंगशालामा घरेलु समर्थकमाझ यो वर्ष हुने विश्वकपमा देशको लागि फेरि खेल्ने ‘एक लक्ष्य, एक सपना’ भएको बताएका थिए ।

आईसीडी राखिएका खेलाडीहरूले इटालियन सिरी ‘ए’मा खेल्न नसक्ने भएकाले इरिक्सनले इन्टर मिलानसँगको सम्झौता समयावधिअघि नै रद्द गरेका थिए । त्यसपछि उनले इंग्लिस प्रिमियर लिगको क्लब ब्रेन्टफोर्डसँग ६ महिनाको सम्झौता गरेका थिए ।

इरिक्सनले गएको मार्चमा नेदरल्यान्ड्सविरुद्ध मैत्रीपूर्ण खेलबाट अन्तर्राष्ट्रिय फुटबलमा पुनरागमन गरेका थिए । उक्त खेलमा डेनमार्क ४–२ ले पराजित भएको थियो । इरिस्कन जारी सिजनको सुरुमै प्रिमियर लिगकै अर्को क्लब म्यानचेस्टर युनाइटेडमा अनुबन्ध भएका थिए ।

इरिक्सनसँगै टोटनहमका मिडफिल्डर पियरे–इमिल होजबर्ग, लिड्स युनाइटेडका रक्षक रासमुस क्रिस्टेनसेन र ब्रेन्टफोर्डका म्याथियास जेनसेन पनि डेनमार्कको टिममा अटाएका छन् ।

समूह ‘डी’को पहिलो खेलमा ट्युनिसियाविरुद्ध खेलेपछि डेनमार्कले नोभेम्बर २६ मा साविक विजेता फ्रान्स र नोभेम्बर ३० मा अस्ट्रेलियाविरुद्ध खेल्नेछ ।

डेनमार्कको प्रारम्भिक टोली

गोलकिपर : कास्पर स्माइकल (नीस) र ओलिभर क्रिस्टेनसेन (हेर्था बर्लिन) ।

रक्षक : सिमोन केहर (एसी मिलान), योआकिम एन्डरसन (क्रिस्टल प्यालेस), योआकिम माहले (एटलान्टा), आन्द्रेस क्रिस्टेनसेन (बार्सिलोना), रासमुस क्रिस्टेनसेन (लिड्स), यन्स स्ट्राइगर लार्सन (ट्राब्जोन्सपोर), भिक्टर नेल्सन (गालाटासारे) र डेनियल वास (ब्रोन्डबाई) ।

मिडफिल्ड : थोमस डेलेनी (सेभिया), म्याथियास यन्सेन (ब्रेन्टफोर्ड), क्रिस्टियन इरिक्सन (म्यानचेस्टर युनाइटेड) र पियरे–इमिल होजबर्ग (टोटनहम) ।

फरवार्ड : एन्ड्रियास स्कोभ ओल्सेन (क्लब ब्रुग), जेस्पर लिन्डस्ट्रोम (इन्ट्राचट फ्रांकफर्ट), आन्र्देस कर्नेलियस (कोपेनहेगन), मार्टिन ब्रेथवेट (इस्पानियोल), कास्पर डोलबर्ग (सेभिया), मिकेल डम्सगार्ड (ब्रेन्टफोर्ड) र जोनास विन्ड (भिएफएल उल्फस्बर्ग) ।